٥ عادات مالية سلبية لو غيرتها .. حياتك هتتغير!

كل إنسان عنده موهبة مختلفة عن التاني، شاطر فيها وبتميزه عن غيره من الناس .. 

في اللي بيقدر يشتري طلبات كويس من غير ما يخرج عن مصروف البيت، وفي اللي بيصلح كل حاجة في بيته بنفسه، وفي اللي بيقدر ينظم سفريه حلوة بأقل ميزانية ممكنة. 
وفي بقى اللي بييجي ويبوظ الميزانية على الآخر، مهما كانت الميزانية كبيرة او مفتوحه مش بتكفي!! 
غالباً الشخص ده مش عارف ليه بيحصل كدة معاه، ودايماً بيقول طيب ازاي انا عملت ايه، الفلوس خلصت ازاي.

وده طبعاً بيرجع لبعض العادات المالية السلبية، وهي السبب الأساسي في تحول حياة ناس كتير لدايرة مفرغة من الضغوط والديون والالتزامات حتى لو الدخل الأساسي كان كويس جداً.

مشكلة العادات المالية السيئة، بتتلخص في اعتمادها على دوافع نفسية خفية، بعضها بيكون محور عمليات التسويق وجوهر صناعة الإعلانات، والهدف الأول من كل ده هو الحصول على أموالك الخاصة، من خلال سلع وخدمات انت فعلياً مش محتاجها!

تعالوا نتعرف مع بعض على أهم ٥ عادات مالية سلبية بيعملها الإنسان وهو مش حاسس بتتسبب في كل الديون والضغوط دي:

١- الاندفاع العاطفي للشراء:

وده بيرجع للخصومات والعروض اللي بيشوفها الشخص قدامه طول الوقت، ودي بتولد جواه شعور انه دايماً محتاج يلحق يجيب الحاجة دي علشان عليها عرض (قبل ما تغلى أو يرجع سعرها الأساسي من تاني) هنا هو بيندفع للشراء بدون ما يفكر هل انا فعلاً محتاج الحاجة دي ولالا! 

٢- عدم تحديد مصروف شهري:

عدم تحديد مصروف شهري هو اكبر غلطة بيغلطها الناس، لأنها من أهم العوامل اللي بتساعدك تظبط قراراتك في الشراء … لما تحددها هتلاقي نفسك مع كل عملية شراء بتحسب صرفت قد ايه و فاضل قد ايه، وهنا هتقدر تسيطر على النقطة الأولى اللي اتكلمنا عنها وهي الشراء العاطفي. 

٣- الاعتماد على بطاقات الائتمان:

الاعتماد على بطاقات الإئتمان سبب في ديون ناس كتير جداً، لإن الإنسان بطبعه بيحب الحاجة الأسهل .. 

هشتري دي دلوقتي بس وهسدد بعدين، طيب هجيب ده بالمرة، ده انا لسه قدامي ٥٠ يوم على ما ادفع، هبقى اسددها بعدين مش مشكلة!

لكن هو مش واخد باله انه بيحمل نفسه ديون وفوائد يومية، هتتسبب على المدى البعيد في ضرر كبير جداً بميزانية وبحياته المالية.

٤- الراحة الكاذبة:

والنقطة دي بتتلخص في سعي الإنسان دايماً للحاجة الأسهل والأكثر راحة .. وده مش غلط ولا عيب طول ما هو عارف هو بيعمل ده ازاي وليه وامتى .. 

لو فكرنا هنلاقي ان اكتر من ٥٠٪ من رواتب الناس بتضيع على الأكل الجاهز بسبب استسهالهم لطلب الوجبات الجاهزة عن دخول المطبخ وعمل وجبة ممكن متاخدش ١٥ دقيقة من وقتهم وهتوفر مبلغ كبير من ميزانيتهم وصحتهم كمان هتبقى احسن!  

٥- السفر في مواسم الذروة، أو عدم التخطيط الجيد للسفر:

جرب في مره سافر في غير ٣ شهور الصيف، قبلها أو بعدها بشهر وشوف هتستمتع قد ايه وهتوفر كمان قد ايه … وشوف بنفسك أسعار الخدمات السياحية بعد انتهاء فترة الموسم، وهتكتشف أنك دفعت مايقارب من ٧٠٪ زيادة عن الأسعار خارج أيام الموسم.

لو عايز تتخلص من عاداتك المالية السلبية، وتنعم بحياة مالية صحية وسليمة بعيد كل البعد عن الديون و الضغوط والالتزامات .. 

احصل على استشارة بكل خصوصية لمدة ٣٠ دقيقة مع د. حازم عبد الرحمن الاستشاري المالي و الإقتصادي ومؤسس منصة إدخار لإدارة وتنظيم الحياة المالية بكل سهولة وبساطة.